. >>>

17 Mei 2009
Dibaca :

MANOLSOL DIPUDI NDANG MARGUNA

Boasa songon na tungki jala dongon bohimu, eda Nai Longatiar, aha arsakmu huroha? Ninna nai minta tu Nai Longatiar. Ba aha ma da eda! So marsak situtu rohangku, ai ndang tarbereng ahu be donganku ala ni ilangku dohot haurahonku, lumobi ala pangula ni huria (parhalado) muse do amanta. O, taringot tu berengku si Longatiar i do na ni dokmu? Ninna nai Longatiar. Olo, i ma da eda! Ninna Nai Longatiar mangalusi. Ai beha huroha taringot tu si Longatiar i, ndang hea hubege taringot tusi ninna Nai Lampita manorohon hatana. A, ganjang do nian taringot tusi, ai huhilala, na parigat-rigat bulung ni gaol do hamu, pasigat-sigat bulung ni bulu, na mangarungkai hinadangol do hamu hamu laho paingot-ingot hinalungun. Alai hudok pe songon i hundul ma jolo satongkin asa hupajojor sidangolonhon. Dung i hundul ma nasida na tolu manguselleng manghatai.



Marbarita ma Nai Longatiar, didok: Silongatiar dope nian boru buhabajungku dilehon Debata. Dibahen las nirohangku hubahen ibana marsingkola, nunga tammat ibana sian S.P.G dua taon naung salpu, alai matua so adong penempatanna dibahen pamarenta. Nunga mulahulak ibana mambahen permohonanna asa ditempathon nian ibana, hape matua so adong do ingananna. Jadi gabe sai rap ma ibana dohot angka namarbaju na di hutanta on, alai apala dongan-donganna i ma si Mintasi naung tammat sian sikola Lanjutan Pertama. Jotjot ma nasida huida mardalan-dalan rap dohot doli-doli, apala di rondang ni bulan ma, didok nasida: ” Terang-terang bulan”. Ba sogo ma rohangku disi, ai nunga tung alo i tu pangkilalaanku, ai dang hea masa na songon i di haposoonniba. Muruk-muruk ma ahu tu si Longatiar i, unang sai didatdati be nian si songon i. Molo sai naeng mangkatai ho dohot doli-doli bat u bagasta ma nasida ro martandang, ningku ma tu ibana. Gabe jotjot ma hami pasual dohot ibana si ala ni i. Didok si Longatiar i ma tu ahu: ai dirimpu ho songon kolot ni hamu be hami naposo nuaeng, ai ndang diida ho angka baoa do dongan niba di parsingkolaan, ba ndang hea tarurak iba, binoto do mangaramoti, mangarajai diri niba. Dung i tung bahenon ma haurahon tu natorasniba dohot tu angka ibotoniba?

Alai atik pe songon i alusna ndang sonang rohangku tongtong do ibana hubadai, hupodai taringot tu parsaoranna na bebas i. Alai ianggo apala pajut dohot patunduk rohangku hata poda ni amanta do.

Didok amanta ma tu ahu: O, inang ni Longatiar unang pola sai marsoali ho dohot borunta si Longatiar taringot tu pargaulan, parsaoranna i rap dohot angka donganna magodang, ai nunga asing naposo nuaeng sian hita naposo najolo, ai bege ma, hupaboa hata ni sahalak sintua ni sada huria tu ahu Na sogo roha ni sintua i di pargaulan bebas ni angka naposo di huriana i, gabe dipangido sintua i ma tu guru ni huria i asa mandok sipaingot jolo ibana tu angka naposobulung i di tingki parguruendean nasida. Saut ma jongjong sintua i mandok hata sipaingot tu angka naposo bulung i taringot tu pargaulan bebas i. Godang do sijagaon disi, ninna sintua i. Alai dung sun sintua i mandok sipaingot i, jongjong ma sahalak namarbaju naung tatang pardagingonna, didok ma mangalusi sintua i. Amang, sintua, sintong situtu do sipaingot muna i, laos songon i do poda ni halak amanta dohot inanta tu ahu. Huihuthon ma poda nasida i, ndang olo ahu mandongani angka donganhu nabarbaju i mardalan-dalan bodarina, nang di torang ni bulan, lumobi mardonganhon doli-doli. Tinggal di jabu nama ahu hundul mangkulhul, manirat, manulam, mangarenda, hape ndang adong na ro manopot ahu, ala so ditanda halak be ahu, hape angka na tubu dipudingku nunga torop marmulian, gabe hatinggalan nama ianggo ahu. Umbege i gabe hohom ma sintua i.

Ahu pe dung hubege barita na sian amanta i hohom nama ahu. Hupasombu nama si Longatiar i di pargaulanna i, jala laos martandang modom ma ibana tu bagas ni si Mintasi donganna magodang i.

Hape dung adong manang piga bulan si Longatiar na marpargaulan bebas i. digora halak ma pardagingonna, ai nunga marbadan dua ibana. Dihatahon halak ma i tu hami. Hupamanat hami ma tutu pardagingon ni si Longatiar i, nunga sintong na pinadok ni jolma i. Marsak ma hami dohot dongan sabutuha dohot angka tondong, sisolhot.....

Bersambung...





Share





Artikel Lainnya

Tidak ada komentar:

Posting Komentar

Ada kesalahan di dalam gadget ini