. >>>

15 Mei 2009
Dibaca :

Dainang Pangintubu

Dung lam matua iba, lam niingot ma sude poda ni natua-tua manorusi tu roha nang di angka na niula. Ndang lupa ahu di pangajarion ni dainang pangintubu, asa unang margabus. Tingki i marumur ma ahu hirahira 7 taon. Partiga-tiga do dainang pangintubu, jala dung ro ibana sian onan, disuru ma ahu mamilangi uangna dibahen di hadang-hadangan. Di tingki i masa do juji di angka dakdanak, jadi porlu ma uang asa boi marjuji. Tubu ma tu rohakku naeng mambuat, marhitehite mambahen salompitan sampulu sada lembar, (sasintongna ingkon 10 lembar do). Dung sidung hubilangi, hupaboa ma tu dainang pangintubu godang ni bilangan ni uang na i.

Didok dainang ma tu ahu ”bilang (etong) ma jolo amang sahalinari. Ai molo songoni do ndang adong be na huomo”. Marlobok ma tarontokhu hururut ma muse sada sian lompitan, alai hutinggalhon dope debanari salompitan 11 lembar. Hupaboa ma muse godangna tontu tamba ma sian na parjolo.

Didok dainang ma muse ”hurang tangkas dope i, amang hasian, tung etong damang ma jolo muse, ai molo songoni tong dope rugi ahu, hape mangihuthon paretonganhu adong do na huomo”. Marlobok ma muse tarontokhu gumogo sian na parjolo, pola hodohan ahu. Huetong ma muse, jala hururut ma debanari sadasada sian lompitan na, alai adong dope tinggal salompitan 11 lembar. Didok dainang ma tu ahu: ”Unang margabus ho amang”, ai hubilangi hian do i nangkin sian onan, na husursari do i, jala hudokon ho mangetong. Molo porlu di ho hepeng pangido tu ahu, alai palaho ma tu na denggan. Sai na dapot do pargabus, holan soal tingki do. Molo dung margabus, manangko ma muse, jala dang haposan be.

Dung olat ni na masa I, molo didokhon ahu mangetong uangna, sai ro ma tu rohakku, naung dietong dainang do on. Sahat tu sadarion, huingot do poda ni dainang i. Jala bangkol do ahu margabus.

Na lambok do dainang mangajari hami, ndang hea risi hatana, jala tung sude do hami mabiar margabus.

Digombarhon na masa on do, pendidikan ni ina pangintubu dibagasan halambohon, tung mansai manorusi do I tu ianakhonna.

Molo pinarateatehon do pangajarion nuaeng tu angka ianakhonta, jotjot do hita dibagasan muruk, hape jotjot ndang dioloi angka ianakhonta hita. Patut do didok angka natuatua: Hata na lambok tumajom do pangonaionna sian hata na koras”.

Sude do hita umbotosa ulaon ni supir. Molo di dalan na tigor i boi do supir mamboan hatop motor i, jala rem ni motor i tong do sai manat diparateatehon, jala molo adong bahaya hatop direm. Ndang hea supir mambahen hatop di dalan tekongan, songon hatopna di dalam na tigor. Songoni ma pambahen ni dainang tu hami. Adong do tingkina maminsang, jala adong do tingkina mangalehon semangat. Di hata nuaeng, on ma hape na nidokna: ” Kebijaksanaan”.

Sibasabasa do tu angka ina dilehon Tuhanta halambohon ai umumna sai lumambok do angka ina sian ama; atik pe adong sadasada rumisi ina sian ama. Nidok ni turpuk on, manorusi do pangajarion ni ina na lambok marhitehite pangulaon manogunogu ianakhonna.

Diketik ulang dari tulisan Drs. L .D Siagian
SP INA Mei 1985






Share





Artikel Lainnya

1 komentar:

delianadonata mengatakan...

ima ate bang.. ahu hian sering do disuru oppungku marhitung hepengna.. alai tikkini dang barani au mambuat, alana huingit patik pawaluhun unang manakko.. jadi ala polos dope iba attong tikkini, jadi dang tamba ma dosa tikki i.. bah, hape molo saonari.. setiap perbuatan sei adong do cara pembenanran, gabe niulahonma akka dosai,,kekekkeke

Posting Komentar

Ada kesalahan di dalam gadget ini